به گزارش طنین باران، یادیما گلن آخیر دفعه کی اورکدن گولموشم، گولماخدان گؤزلریمین یاشی آخیب، قارنیم سانجیلانیب آز قالیب دالاغیم شیشسین بلکه ۲۰-۲۵ ایل بوندان قاباق رحمتلیق اسماعیل حیدرینین مشهد جریانینا اول دفعه قولاق آسدیغیم گونیدی. دا ایندی چوخ چوخدان دی گولملی بیر شئیلره بیر بالاجا دوداغیم قاچار، بیراز دا گولملی اولسا بلکه بیراز دیشلریمی ده آغارتدیم، نهایت گولماغیم بو اولار کی نفسیمی ائشییه وئریب بیر «حیح» سسی ده چیخاردام، یانی چوخ بتردن گولدوم. اونا گؤره همیشه منه سوال دی، بعضی آداملار نه جور اوجا سسینن گوله بیلیرلر؟ نمنه‌یه بوجور گولورلر؟ گده گولمه‌لی بیر شئی وار دیین بیز ده گولاخ. منیم بو سس‌سیز گولماغیم منده بیر عقده یارادیب هر هاردا هرکیمدن قاققیلدی سسی ائشیدسم طرفی ائششه‌یین سی‌دی سینه حواله ائلرم.ایش یئرینده همکارلاریمین گولماخ سسلرین هاردان ائشیدسم تانیارام: مثلن بو ۸۰ هرتز فرکانسینان ها ها ها ها گولن آدام فیلان کس دی، بو دا کی هی هی هی هی ائله بیل ژیان استارت وورور بهمان کس دی. آرادا بیر فرکانسی نابلد گولماخ سسی ائشیدسم بیلرم بازارا تازا … گلیب.دوستلارین بیری واریدی اونا «اپسیلون» قدر گولمه‌لی بیر سؤز دئسئیدین باشلاردی «بی‌نهایت» اوجا سسینن گولماغا، ایکی قت بوکولوب آچیلاردی، الین ده شاپبا شاپ قیچینا چیرپاردی قاققیلداردی. قردشی ده دؤهتوریدی، دؤهتورلوق فازی گؤتورردی دییردی: «ایوای او قدر گولدوم طحالیم آغریدی». آدام اؤز اؤزونه دییردی اولان گؤره‌سن من نه دئدیم آخ؟ یانی چوخ گولمه‌لی سؤز دئدیم؟ بیر سئری سوروشدوم دئدی: «یوخ بابام! یالاندان گولورم!»- نئجه یانی؟- به بیلمیرسن؟ آدام گولنده بدنده اکسی توسین، اندورفین کیمی هورمونلار ترشح اولار. آدام یالاندان گولسه ده، بئیین هوش ائله‌مز کی یالاندان گولورسن، ائله او هورمونلار ترشح اولار!- آخ به بیزیم تک هوش ائلیین یئریمیز بئیین دی، نه جور اؤزو هوش ائله‌مز؟- اینانمیرسان؟ ایندی «یوگای خنده» آدیندا بیر شئی وار، اؤزون واریدسن گئت سئرچ ائله باخ گؤر دا نه قدر خئیری وار.
گئتدیم باخدیم گؤردوم دوز دییر، بئله بیر شئی وار! آرادا بیر من ده اوجا سسلی گولدوم. آما آز قالیردی جماعتینن داعوام چیخسین چون دییردیلر بس مسخره ائلیرم! ییغیشدیردیم گئتدی. قوندارما گولماخ هر آیری قوندارما بیر شئیه تای زهله‌سیز اولور. آدام دوغرودان گولنده، گؤزلری ده گولر، حتی سسی چیخماسا دا. آما یالاندان قاققیلداماق ائله باشدا دئدیغیم یئره حواله اولمالی دی.